जळगाव जामोद(प्रतिनिधी):
पळशी सुपो येथील परिसरात गेल्या काही दिवसांपासून घाणीचे मोठे साम्राज्य पसरले असून, ग्रामपंचायत प्रशासनाच्या अनास्थेमुळे नागरिकांचे आरोग्य कमालीचे धोक्यात आले आहे. गावातील नाल्यांवरील सिमेंटचे धापे ठिकठिकाणी तुटलेले आहेत. या तुटलेल्या धाप्यांमुळे नाल्यांमधील मैलायुक्त व शौचालयाचे घाण पाणी थेट पिण्याच्या पाण्याच्या पाईपलाईनमध्ये मिसळत असल्याचा धक्कादायक प्रकार समोर आला आहे. यामुळे नागरिकांना दूषित पाण्याचा पुरवठा होत असून, गावात महामारी पसरण्याची भीती निर्माण झाली आहे.स्थानिक नागरिकांनी दिलेल्या माहितीनुसार, गावातील मुख्य रस्ते आणि अंतर्गत गल्ल्यांमधील नाल्यांची दुरवस्था झाली आहे. अनेक ठिकाणी नाल्या तुंबल्या असून, घाण पाणी रस्त्यावर साचत आहे. त्यातच पिण्याच्या पाण्याची पाईपलाईन या नाल्यांच्या खालून किंवा अगदी जवळून गेली आहे. धापे तुटल्यामुळे आणि नाल्यांची योग्य स्वच्छता न झाल्यामुळे शौचालयाचे व इतर सांडपाणी पिण्याच्या पाण्याच्या पाईपलाईनच्या गळती असलेल्या भागातून आत जात आहे. परिणामी, नळांना अत्यंत दुर्गंधीयुक्त आणि दूषित पाणी येत आहे.या दूषित पाण्याचा वापर करावा लागत असल्यामुळे लहान मुले, वृद्ध तसेच महिलांमध्ये उलट्या, जुलाब, काविळी आणि पोटाचे विविध आजार बळावण्याची तीव्र शक्यता निर्माण झाली आहे. ग्रामस्थांच्या आरोग्याचा इतका गंभीर प्रश्न निर्माण झालेला असतानाही स्थानिक प्रशासन सुस्त बसले आहे.
प्रशासनाचे साफ दुर्लक्ष!
या अत्यंत गंभीर समस्येबाबत गावातील जागरूक नागरिकांनी आणि तरुणांनी ग्रामपंचायत प्रशासनाला वारंवार तोंडी व लेखी स्वरूपात कळवले आहे. मात्र, प्रशासनाकडून या समस्येकडे साफ दुर्लक्ष केले जात आहे. तक्रार करूनही कोणतीही ठोस कारवाई केली जात नसल्याने 'प्रशासन नागरिकांच्या जिवाशी खेळत आहे का?' असा संतप्त सवाल नागरिक उपस्थित करत आहेत.
तात्काळ दुरुस्तीची मागणी; अन्यथा आंदोलनाचा इशारा..
गावातील तुटलेले धापे तातडीने बदलण्यात यावेत, पिण्याच्या पाण्याच्या पाईपलाईनची गळती थांबवून ती तात्काळ दुरुस्त करण्यात यावी आणि लोकांना शुद्ध पाण्याचा पुरवठा सुरू करण्यात यावा, अशी आग्रही मागणी पळशी सुपो येथील ग्रामस्थांकडून होत आहे. जर ग्रामपंचायत प्रशासनाने येत्या दोन ते तीन दिवसांत यावर कायमस्वरूपी तोडगा काढला नाही, तर नागरिकांच्या आरोग्यासाठी ग्रामपंचायतीवर तीव्र ठिय्या आंदोलन छेडण्यात येईल, असा इशारा संतप्त ग्रामस्थांनी दिला आहे.