जळगाव जामोद(प्रतिनिधी);
जळगाव जामोदच्या न्यायव्यवस्थेच्या दृष्टीने एक अतिशय महत्त्वपूर्ण आणि ऐतिहासिक निर्णय घेण्यात आला असून, मुंबई उच्च न्यायालयाकडून येथे अतिरिक्त जिल्हा व सत्र न्यायालय स्थापन करण्यास मान्यता देण्यात आली आहे.या निर्णयामुळे लवकरच जळगाव जामोद येथे अतिरिक्त जिल्हा व सत्र न्यायालय कार्यरत होण्याचा मार्ग पूर्णपणे मोकळा झाला आहे.जळगाव जामोद येथे अतिरिक्त जिल्हा व सत्र न्यायालय सुरू केले जावे, यासाठी आमदार डॉ. संजय कुटे यांनी सातत्याने पाठपुरावा केला होता.उच्च न्यायालयाने न्यायालयाच्या स्थापनेस मंजुरी दिल्याने त्यांच्या या अथक प्रयत्नांना मोठे यश आल्याची भावना संपूर्ण परिसरातून व्यक्त होत आहे.
न्यायव्यवस्थेतील सुवर्णटप्पा आणि नागरिकांचे होणारे फायदे या नवीन न्यायालयीन व्यवस्थेमुळे जळगाव जामोदसह परिसरातील नागरिकांची जिल्हा व सत्र न्यायालयाशी संबंधित कामांसाठी दूरवर जाण्याची गरज आता दूर होणार आहे. न्यायालयाची सर्व कामे आणि सुनावणी आता स्थानिक स्तरावरच होणार असल्याने नागरिकांचा वेळ, प्रवास आणि होणारा खर्च वाचणार आहे.प्रलंबित प्रकरणांचा जलद निपटारा: स्थानिक नागरिकांना जलद गतीने न्याय मिळावा यासाठी हा निर्णय अत्यंत महत्त्वाचा ठरणार असून, प्रलंबित प्रकरणांचा निपटारा आता वेगाने होण्यास मदत मिळणार आहे.जळगाव जामोद येथे अतिरिक्त जिल्हा व सत्र न्यायालय सुरू करण्याची मागणी नागरिकांकडून आणि वकील वर्गाकडून अनेक वर्षांपासून सातत्याने केली जात होती. या महत्त्वपूर्ण मागण्यापूर्तीमुळे शहराच्या न्यायालयीन आणि प्रशासकीय विकासात एक नवा आणि मोठा टप्पा जोडला गेला आहे.या ऐतिहासिक निर्णयाच्या पार्श्वभूमीवर आमदार डॉ. संजय कुटे यांनी जळगाव जामोद न्यायालयाच्या बार रूमला प्रत्यक्ष भेट दिली.या भेटीदरम्यान त्यांनी वकील संघाचे पदाधिकारी आणि सदस्यांशी सविस्तर संवाद साधून अतिरिक्त जिल्हा व सत्र न्यायालयाच्या मंजुरीबाबतची सविस्तर माहिती दिली, तसेच न्यायालय सुरू करण्याच्या पुढील टप्प्यातील प्रक्रियेविषयी सुद्धा चर्चा केली.अतिरिक्त जिल्हा व सत्र न्यायालयाच्या स्थापनेसाठी आमदार डॉ. संजय कुटे यांनी केलेल्या मोलाच्या पाठपुराव्याबद्दल वकील संघाच्या सर्व पदाधिकाऱ्यांनी त्यांचे पुष्पगुच्छ देऊन विशेष स्वागत व अभिनंदन केले.