उच्चशिक्षणाकरता अभ्यासक्रम व कार्यक्षेत्राचि निवड करतांना पालकांची भूमिका महत्त्वाची असते मात्र तो निवडताना पालकांसोबतच विद्यार्थ्यांचा आवडीचा तसेच त्यांच्या कलागुणांना वाव देणारा अभ्यासक्रम व कार्यक्षेत्र निवडले पाहिजे असे मौल्यवान मार्गदर्शन जळगाव शिक्षण मंडळाचे अध्यक्ष अनिल जयस्वाल यांनी दि.२० ऑक्टोबरच्या संध्याकाळी शहरातिल दि. न्यु. इरा कनिष्ठ महाविद्यालय व हायस्कूलच्या सभागृहात आयोजित गुणगौरव कार्यक्रमात उपस्थित पालक व विद्यार्थ्यांना केले.दि.न्यू.ईरा कनिष्ठ महाविद्यालय व हायस्कूलमधील इयत्ता दहावी व बारावीतिल गुणवंत विद्यार्थी सत्कार व विशेष शिष्यवृत्ती वितरण कार्यक्रमाचे आयोजन करण्यात आले होते. या कार्यक्रमाच्या अध्यक्षस्थानी जळगाव शिक्षण मंडळाचे अध्यक्ष अनिल जयस्वाल होते तर या कार्यक्रमाला सचिव अनुप पुराणिक, सहसचिव मिलिंद जोशी , संचालक अभिजीत कुळकर्णी, अॅडव्होकेट शशिकांत गुप्ता,प्राचार्य तथा संचालक अविनाश कुलकर्णी, उपप्राचार्य शेख सलीम, पर्यवेक्षक ओमप्रकाश चांडक व ओंकारराव तायडे यांची प्रमुख उपस्थिती होती . सरस्वती पूजन व मान्यवरांच्या स्वागताने कार्यक्रमाचा प्रारंभ झाला. गुणगौरव समारंभाचे प्रास्ताविक व यामधील विविध विशेष शिष्यवृत्ती तसेच बक्षिसे याबाबतची माहिती प्राचार्य अविनाश कुळकर्णी यांनी दिली . संस्थेचे सचिव अनुप पुराणिक यांनी सतत यशस्वी होण्यासाठी कठोर परिश्रम करण्याचे मौल्यवान मार्गदर्शन केले . संस्थेतून इयत्ता दहावी व बारावीत उच्चतम गुणप्राप्त तसेच विविध विषयांमध्ये प्रथम आलेल्या विद्यार्थी व विद्यार्थिनी व त्यांचे पालक यांचा सत्कार करून त्यांना बक्षीसांचे वितरण करण्यात आले . माध्यमिक स्तरातील विविध गुणवंत विद्यार्थ्यांना विशेष शिष्यवृत्तीचे वितरण मान्यवरांच्या हस्ते करण्यात आले . या वेळी उपस्थित गुणवंत विद्यार्थ्यांनी त्यांच्या यशामध्ये संस्थेचा महत्त्वाचा वाटा असून शालेय जीवनात या शाळेने गुणवत्तापूर्ण शिक्षणासोबतच सुसंस्कार दिल्याचे सांगितले . कार्यक्रमाचे संचालन शिक्षिका सुजाता बोंबटकार , निळकंठ राठोड ,गणेश आसेरकर व अभिजीत जोशी यांनी तर आभारप्रदर्शन केशव येवले यांनी केले.