राज्यातील सर्व नागरिकांना आपत्कालीन परिस्थितीत तात्काळ पोलीस सेवा किंवा मदत एकाच टोल फ्री क्रमांकावर मिळावी म्हणून डायल 112 ही आपत्कालीन सुविधा संपूर्ण महाराष्ट्र राज्यात सुरु करण्यात आलेली आहे. डायल 112 या क्रमांकाद्वारे प्राप्त होणारे सर्व कॉल प्राथमिक संपर्क केंद्रावर तसेच द्वितीय संपर्क केंद्रावर प्राप्त होतात. कॉल करणाऱ्या व्यक्तीला आपत्कालीन परिस्थितीत आवश्यक मदत तात्काळ मिळण्याकरीता त्या व्यक्तीच्या रिअल टाईम लोकेशनच्या आधारे सदरचे कॉल संबंधीत आयुक्तालयाच्या किंवा जिल्ह्याच्या पोलीस नियंत्रण कक्षाकडे तसेच आवश्यकतेनुसार रुग्णवाहिका, अग्निशमन इत्यादींसारख्या सेवांकडे वर्ग करण्यात येत असतात. तसेच 10 मिनिटाच्या आत सर्व नागरिकांना आपत्कालीन सेवा पुरविली जाते. परंतु काही नागरिक 112 या क्रमांकावर डायल करून खोट्या व तथ्यहीन बाबींना तक्रारीचे स्वरूप देवून पोलीसांच्या वेळेचा अपव्यय करतांना आढळून येत आहेत. तसेच पोलीसांना त्रास व्हावा या उद्देशाने काही खोडसाळ नागरिक या सेवेचा दुरुपयोग करीत असल्याचे आढळून आले आहे. असेच एक प्रकरण जळगाव जामोद पोलीस स्टेशन हद्दीमध्ये दिनांक सात सप्टेंबर रोजी रात्री 9 वाजेच्या सुमारास घडले.एका व्यक्तीने 112 हा क्रमांक डायल करून सांगितले की मला खेर्डा वेस जळगाव जामोद येथील काही इसम मारहाण करीत आहेत त्यामुळे सदरची माहिती नियंत्रण कक्षाकडून तात्काळ जळगाव जामोद पोलीस स्टेशन येथे डायल 112 वर कार्यरत असलेले पोलीस कॉन्स्टेबल मंगेश सोळंके व सचिन राजपुत यांना मिळाली, त्यांनी ड्युटीवर असलेले पोलीस उपनिरीक्षक किशोर घोडेस्वार यांना संबंधित घटनेची माहिती दिली असता दोघांनीही घटनास्थळ गाठले, पोलीस कॉन्स्टेबल मंगेश सोळंके तसेच पोलीस उपनिरीक्षक किशोर घोडेस्वार यांनी सदर घटनेची चौकशी केली असता त्या ठिकाणी कोणालाही मारहाण किंवा शिवीगाळ झाली नव्हती अशी नागरिकांकडून माहिती मिळाली, सदरची माहिती पोलीस उपनिरीक्षक किशोर घोडेस्वार यांनी पोलीस निरीक्षक सुनील अंबुलकर यांना फोन वरुन दिली. यावेळी ज्या इसमाने डायल 112 वर कॉल केला होता तो व्यक्ती मद्यधुंद अवस्थेत सार्वजनिक रस्त्यावर आरडा ओरड व धामधुम करीत असताना मिळून आला.सदर आरोपीला जळगाव जामोद पोलीस स्टेशनला आणण्यात आले व त्यास मेडिकल साठी ग्रामीण रुग्णालय जळगाव जामोद येथे नेण्यात आले होते त्या ठिकाणी डॉक्टरांनी संबंधित आरोपी मद्यधुंद असल्याचे सिद्ध केले.त्यामुळे सदर आरोपी इसमावर जळगाव जामोद पोलीस स्टेशनला अपराध नंबर 517/2022 कलम 177भा.द.वि.चे सहकलम 85(1) महाराष्ट्र दारूबंदी कायदा प्रमाणे गुन्हा दाखल करण्यात आला आहे. आरोपीचे नाव संतोष उखर्डा म्हसाळ वय 47 राहणार खेर्डा वेस जळगाव जामोद येथील असून सदर गुन्ह्याची नोंद पोलीस हेड कॉन्स्टेबल उंबरहांडे यांनी केली. पुढील तपास जळगाव जामोद पोलीस स्टेशनचे पोलीस निरीक्षक सुनील अंबुलकर यांच्या मार्गदर्शनात हेड कॉन्स्टेबल विनोद वानखडे करीत आहेत..
---जळगांव पो.स्टे चे ठाणेदार सुनिल अंबुलकर यांचे नागरिकांना आवाहन---
महाराष्ट्र पोलिसांनी कुणावर अन्याय, अत्याचार, चोरी, मारहाण आणि गुन्हेगारीवर त्वरीत आळा बसवण्यासाठी व पोलीस लवकरात लवकर पोलीस घटना स्थळी पोहचली पाहिजे, याकरिता डायल 112 प्रणाली सुरू केली. या सुविधेचा गैरवापर करून प्रशासनाची दिशाभूल करू नये जेणेकरून अशा खोट्या तक्रार कॉल मुळे सत्य घटनेवर पोलिसांचे दुर्लक्ष होईल असे कृत्य करू नये. डायल 112 वर फेक कॉल किंवा तक्रार करून पोलिसांची दिशाभूल करण्याचा प्रयत्न केल्यास त्या इसमावर कायदेशीर कारवाई करून गुन्हा नोंद करण्यात येईल तसेच या गुन्ह्यांमध्ये सदर इसमास सहा महिन्याचा करावास व पाचशे रुपयांचा दंड या शिक्षेची तरतूद आहे त्यामुळे नागरिकांनी डायल 112 चा दुरुपयोग करू नये, असे आवाहन जळगाव पोलीस स्टेशनच्या वतीने पोलीस निरीक्षक सुनील अंबुलकर यांनी केले...