बस व ट्रकची धडक. ३ ठार २० जखमी.खामगाव नांदुरा महामार्गावरील आमसरी फाट्यानजीकची दुर्घटना...
सुरज देशमुख/बुलढाणा जिल्हा प्रतिनिधी...
विटांची वाहतूक करणारा भरधाव ट्रक आणि मध्य प्रदेश परिवहन मंडळाच्या बसचा भीषण अपघात होऊन ट्रक मधील चालकासह तिघांचा जागीच मृत्यू झाला तर बस मधील 18 प्रवाशी जखमी झाल्याची घटना 15 एप्रिल रोजी सकाळी 8 वाजेदरम्यान खामगाव नांदुरा मार्गावरील आमसरी फाट्याजवळ घडली.जळगाव जामोद तालुक्यातील धानोरा महासिद्ध येथून विटा भरून नांदुराच्या दिशेने जाणारा ट्रक क्रमांक एम एच 28 बीबी 29 सकाळी 8 वाजता आमसरी फाट्यावर पोहोचला असता नांदुऱ्याकडून खामगाव कडे प्रवासी घेऊन येणारी मध्य प्रदेश परिवहन मंडळाची बस क्रमांक एमपी 68 झेडसी 5939 मध्ये भीषण अपघात झाला. सदर अपघात इतका जोरदार होता की ट्रक मधील चालक पातोळ्या मानसिंग भेयड्या (35), मजूर प्रेमसिंग धारवे, बळीराम कोतवाल या तिघांचा घटनास्थळीच मृत्यू झाला. तर मध्य प्रदेश परिवहन मंडळाच्या बसमधील जवळपास 18 प्रवासी जखमी झाले असून यातील सहा प्रवाशांची प्रकृती चिंताजनक झाल्याचे माहिती मिळाली आहे. घटनेची माहिती मिळताच खामगाव व जलंब पोलिसांनी घटनास्थळी धाव घेतली. यावेळी बसमधील जखमी प्रवाशांना तातडीने सामान्य रुग्णालय येथे उपचारार्थ भरती करण्यात आले तसेच सामान्य रुग्णालयातील वैद्यकीय टीमने सुद्धा जखमीवर तातडीने उपचार सुरू केले असून यातील चिंताजनक असलेल्या सहा प्रवाशांना पुढील उपचारासाठी अकोला येथे रेफर करण्यात आले आहे.