सय्यद शकिल/अकोट तालुका प्रतिनिधी...
अकोट शहरातील दोन 16 वर्षीय विद्यार्थ्यांचा सोमवारी दुपारी चिखलदरा तालुक्यातील खटकाळी गावाजवळील डोहात बुडून दुर्दैवी मृत्यू झाला. सातपुड्याच्या पायथ्याशी फिरण्यासाठी गेलेल्या विद्यार्थ्यांसोबत ही दुर्घटना घडल्याने आकोट शहरात हळहळ व्यक्त होत आहे. मृत विद्यार्थ्यांची नावे गिरिधर चंद्रशेखर दाभाडे (16) आणि कृष्णा चंद्रशेखर झामरे (16) अशी आहेत. दोघेही आकोट येथील अंसकी कॉन्व्हेंट शाळेत इयत्ता 11वीत शिक्षण घेत होते.मिळालेल्या प्राथमिक माहितीनुसार, सोमवारी दुपारी सुमारे 3 वाजता अंसकी कॉन्व्हेंटचे काही विद्यार्थी सातपुडा परिसरात फिरण्यासाठी गेले होते. त्यांच्यासोबत एक शिक्षिकाही होती. चार विद्यार्थिनी आणि दोन विद्यार्थी खटकाळी गावाजवळील ब्रिटिशकालीन बंधारा पाहण्यासाठी गेले होते.
बंधारा आणि डोहातील पाण्याचे आकर्षक दृश्य पाहून दोन्ही विद्यार्थ्यांनी पाण्यात उतरून पोहण्याचा प्रयत्न केला. मात्र, डोहाची खोली आणि पाण्याच्या प्रवाहाचा अंदाज न आल्याने दोघेही पाण्याच्या प्रवाहात वाहत जाऊन खोल पाण्यात बुडाले.घटनेची माहिती मिळताच खटकाळी परिसरातील ग्रामस्थ घटनास्थळी दाखल झाले. त्यांनी तातडीने दोन्ही विद्यार्थ्यांचा शोध सुरू केला. बराच प्रयत्न केल्यानंतर ग्रामस्थांच्या मदतीने दोन्ही विद्यार्थ्यांचे मृतदेह डोहातून बाहेर काढण्यात आले.घटनेची माहिती पोलिसांना मिळताच सहायक पोलीस निरीक्षक पाटील हे पोलीस पथकासह घटनास्थळी रवाना झाले. पुढील कारवाई व शवविच्छेदनासाठी दोन्ही मृतदेह आकोट ग्रामीण रुग्णालयात पाठविण्यात आले.सुट्टीच्या दिवशी मित्रांसह आणि शिक्षिकेसोबत फिरण्यासाठी गेलेले दोन्ही विद्यार्थी सुखरूप घरी परततील, अशी अपेक्षा त्यांच्या कुटुंबीयांना होती. मात्र, दुपारनंतर आलेल्या दुर्घटनेच्या बातमीने दोन्ही कुटुंबांवर दुःखाचा डोंगर कोसळला. विद्यार्थ्यांच्या मृत्यूने कुटुंबीयांचा आक्रोश सुरू असून शाळेच्या परिसरातही शोककळा पसरली आहे.या दुर्घटनेनंतर विद्यार्थ्यांना पर्यटनस्थळी नेण्याच्या नियोजनासह त्यांच्या सुरक्षेचा मुद्दा ऐरणीवर आला आहे. धोकादायक जलस्थळावर विद्यार्थ्यांच्या सुरक्षेसाठी पुरेशा उपाययोजना करण्यात आल्या होत्या का, तसेच या फिरण्याचे योग्य नियोजन करण्यात आले होते का, याबाबत प्रश्न उपस्थित होत आहेत.या प्रकरणी शाळा प्रशासनाकडून अद्याप अधिकृत स्पष्टीकरण समोर आलेले नाही. त्यामुळे दुर्घटनेची नेमकी परिस्थिती आणि जबाबदारी पोलीस तपासानंतरच स्पष्ट होणार आहे.सातपुडा आणि चिखलदरा परिसरात पावसाळ्यात डोह, धबधबे, बंधारे आणि इतर जलस्रोतांमधील पाण्याची पातळी व प्रवाह अचानक वाढतो. अनेक ठिकाणी पाण्याची खोली आणि प्रवाहाचा अंदाज येत नसल्याने दुर्घटनेचा धोका वाढतो. खटकाळी येथील दुर्घटनेनंतर पर्यटनस्थळी सुरक्षा व्यवस्था, धोक्याचे सूचना फलक आणि जलस्रोतांपासून पर्यटकांना दूर ठेवण्यासाठी आवश्यक उपाययोजना करण्याची मागणी होत आहे.दोन होतकरू विद्यार्थ्यांच्या अकाली मृत्यूने दोन कुटुंबांवर दुःखाचा डोंगर कोसळला असून या घटनेने परिसरात हळहळ व्यक्त होत आहे. घटनेचा पुढील तपास पोलीस करीत आहेत.