राज्य परिवहन महामंडळाच्या जळगांव जामोद आगाराच्या जळगांव जामोद – पुणे बसमध्ये वाहकाच्या चाणाक्षतेने राज्य परिवहन कर्मचाऱ्याची बनावट पास जप्त करण्यात आली. वाहक योगेश दत्तात्रय किवंडे बिल्ला क्रमांक 83056 हे 6 फेब्रुवारी 2021 रोजी बस पुणे ते जळगांव जामोद फेरीवर कर्तव्य बजावित होते. औरंगाबाद मध्यवर्ती बस स्थानकावरून सदर बस दु 3 वाजता जळगांव जामोदकडे निघाली.प्रवाशांना तिकिटे देत असताना एजाज पठाण यांनी रा. प कर्मचाऱ्याची मोफत प्रवास सवलत पास दाखविली. सदर पास बनावट असल्याची शंका वाहकाला आली असता त्यांनी हर्सुल पोलीस स्टेशनमध्ये बस थांबवून सदर पास व पासधारक प्रवाशाला पोलीसांच्या ताब्यात दिले. औरंगाबाद आगार क्रमांक 2 येथे सदर पासची तपासणी केली असता ती पास बनावट असल्याचे उघड झाले. त्यानंतर पोलीस स्टेशनला वाहकाने तक्रार दिली.वाहक योगेश किवंडे यांच्या चतुराईने रा. प महामंडळाच्या अशा बनावट पास बनविल्या जात असल्याचा खुलासा झाला. आर्थिक नुकसान होण्यापासून वाचविले. या कामगिरीबद्दल विभाग नियंत्रक संदीप रायलवार, विभागीय वाहतूक अधिकारी अमृतराव कच्छवे यांनी वाहकाचा सत्कार केला.