अनिल भगत/आर सी २४ न्युज नेटवर्क...
"तुटले जरी नाते तरी, आठवणी का सुटत नाहीत?" या ओळींची प्रचिती आज सुनगाव येथे आली. काळाच्या ओघात करिअर आणि संसाराच्या व्यापात विखुरलेले सवंगडी तब्बल १५ वर्षांनंतर पुन्हा एकत्र आले, तेव्हा तो क्षण केवळ आनंदाचाच नाही तर अत्यंत भावनिक ठरला. सुनगाव येथील मातोश्री नथियाबाई विद्यालयातील सन २०१० च्या १० वीच्या बॅचचा 'स्नेहमेळावा' (Get-together) आज ९ फेब्रुवारी रोजी मोठ्या उत्साहात आणि आठवणींच्या हिंदोळ्यावर साजरा करण्यात आला.
पुन्हा अनुभवले 'ते' सोनेरी दिवस..
शिक्षण पूर्ण झाल्यावर पोटापाण्यानिमित्त कोणी शहराकडे धाव घेतली, तर कोणी व्यवसायात स्थायिक झाले. मात्र, दीड दशकानंतर सर्व मित्र-मैत्रिणी पुन्हा एकदा एकाच छताखाली जमले तेव्हा जणू शाळा पुन्हा भरल्याचा भास होत होता. यावेळी प्रत्येकाने आपल्या शालेय जीवनातील गमतीजमती, मधल्या सुट्टीतली डबा पळवापळवी, शिक्षकांचा तो प्रेमळ धाक आणि वर्गखोलीतील बाकांवर कोरलेली नावे या आठवणींना उजाळा दिला. एकमेकांच्या आयुष्यातील चढ-उतार जाणून घेताना सर्वांच्या चेहऱ्यावर एक वेगळेच समाधान आणि डोळ्यांत आनंदाश्रू पाहायला मिळाले.
--अस्सल गावरान मेजवानी: मिरचीची भाजी आणि रोडग्याचा बेत--
या सोहळ्याचे सर्वात मोठे आकर्षण ठरले ते म्हणजे 'मैत्रीची मेजवानी'. हॉटेलमधील महागड्या जेवणापेक्षा आपल्या मातीतील अस्सल चवीला प्राधान्य देत, सर्व मित्रांनी एकत्रितपणे मिरचीची भाजी आणि रोडगे बनवले. स्वतःच्या हाताने रांधलेल्या या गावरान जेवणाचा आस्वाद घेताना मित्रांमधील नात्याचा गोडवा अधिकच वाढला. "ही केवळ चव नव्हती, तर त्यात आमच्या बालपणाचा सुगंध होता," अशी भावना यावेळी व्यक्त करण्यात आली.या स्नेहमेळाव्यासाठी सन २०१० च्या बॅचमधील मित्र आणि मैत्रिणी मोठ्या संख्येने उपस्थित होते. यामध्ये अमोल एडाखे, आशिष धुर्डे, संदीप बोबडे, निलेश बानाईत, अमोल सोनोने, विजय दातीर, अविनाश पाटील, ज्ञानेश्वर कपले, अशोक ढगे, किशोर पारवे, पप्पू सय्यद, सागर ढगे, तुषार भटकर, अशोक नानग्दे, दिपक घोलप, निलेश मिसाळ, अमोल काळपांडे, दिनेश नागक्दे, निलेश सातपुते, शत्रुघ्न भगत, रवी वंडाळे, अरविंद कुनगाडे, अर्जुन मिसाळ, मनोहर धर्मे.तसेच महिला वर्गातून पुजा नानगदे, कमल काळपांडे, मीना धुळे, माधुरी घोपे, पुष्पा दातीर, वर्षा अंबडकार, लता हिस्सल, पुष्पा धर्मे, किर्ती पाटील, ज्योती बानाईत, रूपाली महाले, सीमा वंडाळे, वर्षा काळपांडे यांनी उपस्थित राहून जुन्या मैत्रिणींसोबत गप्पांचा आनंद लुटला..
अनुपस्थित मित्रांची उणीव आणि भावनिक साद...
कार्यक्रमाच्या आनंदात असतानाच, जे मित्र काही अपरिहार्य कारणास्तव या मेळाव्याला येऊ शकले नाहीत, त्यांची उणीव पावलोपावली भासत होती. "आज आमची ही टीम पूर्ण असली तरी, काही चेहरे नसल्याने मन थोडे हळवे झाले आहे," असे म्हणत उपस्थित मित्रांनी गैरहजर सहकाऱ्यांना मनापासून 'मिस' केले आणि व्हिडिओ कॉलद्वारे त्यांच्याशी संवाद साधला.आयुष्याच्या प्रवासात पुन्हा एकदा अशाच प्रकारे नियमितपणे एकत्र येण्याचा आणि एकमेकांच्या सुख-दुःखात खंबीरपणे पाठिशी उभे राहण्याचा संकल्प करून या अविस्मरणीय स्नेहमेळाव्याची सांगता झाली.