सुनगावचे तलाठी गौतम वाघ यांची 'विदर्भ पटवारी संघ' उपविभागीय अध्यक्षपदी बिनविरोध निवड...
जळगाव जामोद (प्रतिनिधी):
आपल्या प्रशासकीय कौशल्याने आणि जनसामान्यांच्या प्रश्नांप्रती असलेल्या संवेदनशीलतेमुळे 'कर्तव्यदक्ष अधिकारी' अशी ओळख निर्माण करणारे सुनगाव येथील महसूल अधिकारी गौतम वाघ यांची 'विदर्भ पटवारी संघ, नागपूर' अंतर्गत उपविभाग शाखा जळगाव जामोदच्या अध्यक्षपदी बिनविरोध निवड करण्यात आली आहे. त्यांच्या या निवडीमुळे सुनगाव परिसरात उत्साहाचे वातावरण असून, विविध स्तरांतून त्यांच्यावर कौतुकाचा वर्षाव होत आहे.लोकप्रिय आणि कार्यक्षम नेतृत्व महसूल अधिकारी गौतम वाघ यांनी सुनगाव येथे कार्यरत असताना केवळ शासकीय जबाबदाऱ्याच पार पाडल्या नाहीत, तर गावकऱ्यांशी कौटुंबिक नाते निर्माण केले. महसूल विभागातील गुंतागुंतीचे प्रश्न अत्यंत सुलभतेने आणि पारदर्शकपणे सोडवण्याच्या त्यांच्या पद्धतीमुळे त्यांनी सर्वांची मने जिंकली आहेत. त्यांच्या याच कर्तबगारीची दखल घेत संघटनेने त्यांच्या खांद्यावर उपविभागीय अध्यक्षपदाची मोठी जबाबदारी सोपवली आहे.
या निवडीचे वृत्त समजताच सुनगाव येथील ग्रामस्थांनी आनंद व्यक्त केला. यावेळी माजी जिल्हा परिषद सदस्य सुरेश अंबडकार, तलाठी चौरे, कृषी सहाय्यक गव्हाणे, कृषी मित्र मोहनसिंह राजपूत, माजी सरपंच पुंडलिक पाटील, माजी सरपंच रामेश्वर अंबडकार, ग्रामसेवक हितेंद्र जोशी, पत्रकार राजकुमार भड, गजानन खिरोडकार, गजानन सोनटक्के, गणेश भड, सेवानिवृत्त कोतवाल तुकाराम ढोले, कोतवाल सचिन कपले तसेच गावचे प्रतिष्ठित नागरिक रामेश्वर ठोसर आणि शेतकरी रामेश्वर केदार,अंनता धुळे, श्रावण धुळे यांनी तलाठी गौतम वाघ यांची भेट घेऊन त्यांचे पुष्पगुच्छ देऊन विशेष अभिनंदन केले.
"तलाठी गौतम वाघ यांच्यासारखा कर्तव्यनिष्ठ अधिकारी आमच्या गावाला मिळाला, हे आमचे भाग्य आहे. त्यांच्या निवडीमुळे महसूल विभागाच्या कामाला अधिक गती मिळेल," अशा भावना यावेळी उपस्थितांनी व्यक्त केल्या.
प्रशासकीय कामात शिस्त आणि सामान्य माणसाला न्याय देण्याची वृत्ती यामुळे वाघ हे संपूर्ण तालुक्यात परिचयाचे झाले आहेत. विदर्भ पटवारी संघाच्या माध्यमातून ते आता उपविभागातील कर्मचाऱ्यांचे प्रश्न आणि महसूल कामात अधिक प्रभावी भूमिका बजावतील, असा विश्वास व्यक्त केला जात आहे.