जळगाव जामोद (प्रतिनिधी):
जमिनीचे बनावट दस्तऐवज तयार करून कोट्यवधी रुपयांची फसवणूक करण्याचे प्रकार सध्या वाढत आहेत. असाच एक धक्कादायक प्रकार जळगाव जामोद येथे उघडकीस आला असून, तीन कोटी रुपयांच्या जमिनीच्या व्यवहारात बनावट 'सौदा चिठ्ठी' तयार करून फसवणूक केल्याप्रकरणी एका व्यापाऱ्याविरुद्ध गुन्हा दाखल करण्यात आला आहे.फिर्यादी सागर मधुसुधन गांधी (वय २३, रा. जामोद) यांची मौजे खेलसोनजी येथे गट नं. ५२/१ मध्ये ०.८४ हेक्टर आर जमीन आहे. आरोपी मोहम्मद मुस्ताक मोहम्मद ईसा उर्फ मुश्ताक भाईजान (वय ४५, रा. जळगाव जामोद) याने या जमिनीबाबत बनावट कागदपत्रे तयार केली. सदर जमीन ३ कोटी रुपयांना खरेदी केल्याचे दर्शवणारी एक बनावट सौदा चिठ्ठी (Agreement to Sale) तयार केली. प्रत्यक्षात असा कोणताही व्यवहार झालेला नसताना खोटी कागदपत्रे बनवून फिर्यादीची फसवणूक करण्याचा प्रयत्न केला गेला. अर्जाच्या चौकशीनंतर हा प्रकार स्पष्ट झाला असून, पोलीस अधीक्षक निलेश तांबे यांच्या परवानगीने गुन्हा नोंदवण्यात आला आहे.या प्रकरणी पोलीस स्टेशन जळगाव जामोद येथे भारतीय न्याय संहिता (BNS) नुसार कलम ३१८(४): फसवणूक करणे.कलम ३३६(३): बनावट कागदपत्रे तयार करणे.कलम ३४०(२): बनावट कागदपत्रांचा खऱ्याप्रमाणे वापर करणे अशा विविध कलमान्वये मुस्ताक भाईजान यांच्यावर गुन्हा दाखल करण्यात आला असून.पोलीस निरीक्षक नितीन कुमार पाटील यांच्या मार्गदर्शनाखाली पोलीस उपनिरीक्षक नारायण सरकटे या प्रकरणाचा पुढील तपास करत आहेत.नागरिकांसाठी महत्त्वाची सतर्कता: फसवणूक टाळण्यासाठी 'या' ५ गोष्टी लक्षात ठेवा
भविष्यात अशा प्रकारच्या '४२०' (फसवणुकीच्या) प्रकरणांना बळी पडू नये म्हणून प्रशासनातर्फे आणि कायदेतज्ज्ञांतर्फे खालील काळजी घेण्याचे आवाहन करण्यात आले आहे:
१. कागदपत्रांची पडताळणी: जमिनीचा व्यवहार करताना केवळ 'सौदा चिठ्ठी'वर विश्वास ठेवू नका. ७/१२ उतारा, फेरफार आणि 'बोजा' तपासण्यासाठी अधिकृत 'महाभुलेख' पोर्टलचा वापर करा.२. नोंदणीकृत दस्तऐवज: कोणताही आर्थिक व्यवहार करताना तो दुय्यम निबंधक कार्यालयात (Registrar Office) नोंदणीकृत (Registered) स्वरूपातच करा. कच्च्या कागदावरील किंवा नोटरी केलेल्या व्यवहारांना कायदेशीरदृष्ट्या पूर्ण संरक्षण नसते.३. साक्षीदारांची खात्री: व्यवहार करताना साक्षीदार ओळखीचे आणि विश्वासार्ह असावेत. अनोळखी व्यक्तींच्या मध्यस्थीने होणाऱ्या व्यवहारांपासून सावध राहा.४. बँकेद्वारे व्यवहार: शक्यतो रोख (Cash) व्यवहार टाळा. चेक, RTGS किंवा NEFT द्वारे व्यवहार केल्यास तुमच्याकडे पैशांच्या देवाणघेवाणीचा कायदेशीर पुरावा राहतो.५. बनावट सही-शिक्क्यांपासून सावध: कोऱ्या कागदावर किंवा स्टॅम्प पेपरवर कधीही स्वाक्षरी करू नका. जुन्या तारखेचे स्टॅम्प पेपर वापरून बनावट सौदा चिठ्ठी बनवण्याचे प्रमाण जास्त आहे, त्यामुळे स्टॅम्प खरेदीची तारीख नेहमी तपासा.जर आपली किंवा आपल्या ओळखीच्या कोणाची अशा प्रकारे फसवणूक झाली असेल, तर घाबरू नका. तात्काळ जवळच्या पोलीस स्टेशनशी संपर्क साधा किंवा सायबर क्राईम विभागाकडे तक्रार नोंदवा. आपल्या सतर्कतेमुळेच गुन्हेगारांना चाप बसेल!