महामानवांच्या जयंतीचा उत्साह; शांततेचे रक्षण हेच खऱ्या अर्थाने अभिवादन - ठाणेदार नितीन पाटील...
जळगाव जामोद(प्रतिनिधी):
क्रांतीसूर्य महात्मा ज्योतिबा फुले आणि भारतीय राज्यघटनेचे शिल्पकार विश्वरत्न डॉ. बाबासाहेब आंबेडकर यांची जयंती म्हणजे सामाजिक समतेचा आणि उत्साहाचा महाकुंभ! हा उत्सव केवळ जल्लोषाचा नसून तो विचारांचा जागर व्हावा, यासाठी जळगाव जामोद पोलीस प्रशासन सज्ज झाले आहे. "उत्सव महामानवांचा, वारसा शांततेचा" हे ब्रीद समोर ठेवून शहरात आणि तालुक्यात चोख बंदोबस्त तैनात करण्यात आला असून, ठाणेदार नितीन पाटील यांनी जनतेला शांततेचे आवाहन केले आहे.महापुरुषांची जयंती साजरी करताना सामाजिक सलोखा अधिक दृढ व्हावा, ही काळाची गरज आहे. जळगाव जामोद शहराचा लौकिक शांतताप्रिय शहर म्हणून आहे, तो याही वर्षी कायम राखण्यासाठी पोलीस स्टेशन स्तरावर विशेष नियोजन करण्यात आले आहे. सर्व सार्वजनिक उत्सव मंडळांना नियमावलीचे पालन करण्याच्या सूचना देण्यात आल्या असून, हुल्लडबाजी करणाऱ्यांवर पोलिसांची करडी नजर असणार आहे.फेसबुक, व्हॉट्सॲप आणि इंस्टाग्रामवर आक्षेपार्ह मजकूर पसरवणाऱ्यांवर सायबर सेलच्या माध्यमातून वॉच ठेवला जात आहे. "अफवांवर विश्वास ठेवू नका आणि समाजात तेढ निर्माण होईल असे कृत्य करू नका," असा स्पष्ट इशारा प्रशासनाने दिला आहे.
__________________
"महामानवांनी आपल्याला समता, बंधुता आणि शांततेची शिकवण दिली आहे. त्यांचा जयंती उत्सव साजरा करणे ही आपल्यासाठी अभिमानाची बाब आहे, मात्र हा आनंद साजरा करताना कायदा व सुव्यवस्थेचे भान राखणे हेच त्यांना दिलेले खरे अभिवादन ठरेल. जळगाव जामोद तालुक्यातील प्रत्येक नागरिकाने पोलीस प्रशासनाचे डोळे आणि कान बनून सहकार्य करावे. आपण सर्वांनी मिळून हा उत्सव मोठ्या हर्षोल्हासात, पण तितक्याच संयमाने आणि शांततेत साजरा करूया.कायद्याचे उल्लंघन करणाऱ्यांची गय केली जाणार नाही, पण नियमांचे पालन करणाऱ्यांच्या पाठीशी पोलीस प्रशासन खंबीरपणे उभे आहे."
— नितीन पाटील
(ठाणेदार, पोलीस स्टेशन जळगाव जामोद)
_____________________
मिरवणुकीत पारंपारिक वाद्यांना प्राधान्य देऊन ध्वनी प्रदूषणाची पातळी पाळावी.संशयास्पद हालचाली दिसल्यास तात्काळ पोलीस स्टेशनशी संपर्क साधावा.सर्व धर्मीय बांधवांनी एकत्र येऊन महामानवांना अभिवादन करावे.तसेच जळगाव जामोद पोलीस दलाने या उत्सवासाठी 'मोडस ऑपरेंडी' तयार केली असून ठिकठिकाणी फिक्स पॉईंट्स आणि गस्त वाढवण्यात आली आहे. हा जयंती उत्सव ऐतिहासिक आणि आदर्श ठरेल, असा विश्वास यानिमित्ताने व्यक्त होत आहे.