सय्यद शकिल/अकोट...
स्वप्नांनी भरलेले आयुष्य,कुटुंबाच्या आशा-अपेक्षांचा आधार आणि भविष्यासाठी अनेक योजना मनात बाळगणाऱ्या बोर्डी येथील राकेश शेषराव वाकोडे वय १८ वर्ष या तरुणाचा इलेक्ट्रिक शॉक लागून दुर्दैवी मृत्यू झाल्याची हृदयद्रावक घटना घडली.अकोट तालुक्यातील बोर्डी येथे या घटनेमुळे संपूर्ण परिसरात हळहळ व्यक्त होत असून गावावर शोककळा पसरली आहे.मिळालेल्या माहितीनुसार, राकेश शेषराव वाकोडे (वय १८वर्षे, रा.बोर्डी) यांना अचानक विजेचा जोरदार धक्का बसला.या अपघातात ते गंभीर जखमी झाले.घटनेनंतर त्यांना तातडीने वैद्यकीय मदतीसाठी हलविण्याचा प्रयत्न करण्यात आला.मात्र उपचारापूर्वीच त्यांची प्राणज्योत मालवली.अचानक घडलेल्या या घटनेमुळे कुटुंबीयांवर दुःखाचा डोंगर कोसळला आहे. घरातील तरुण सदस्याच्या अकाली जाण्याने नातेवाईक आणि ग्रामस्थांमध्ये शोक व्यक्त केला जात आहे.गावात सर्वत्र हळहळीचे वातावरण असून राकेश यांच्या निधनाने मित्रपरिवारालाही मोठा धक्का बसला आहे.या प्रकरणाची नोंद अकोट ग्रामीण पोलीस ठाण्यात करण्यात आली असून पुढील तपास पोलीस करीत आहेत.दरम्यान,या दुर्दैवी घटनेने पुन्हा एकदा विद्युत सुरक्षेबाबत जागरूक राहण्याची गरज अधोरेखित केली आहे.उमलत्या वयात काळाने घातलेल्या या घाल्याने बोर्डी गाव शोकमग्न झाले आहे.