जळगाव जामोद(प्रतिनिधी):
सामान्य परिस्थितीवर मात करत, कठोर परिश्रम आणि जिद्दीच्या जोरावर खेर्डा बुद्रुक येथील सुपुत्र निखिल रमेश बंबटकार यांनी पोलीस दलात मानाचे स्थान मिळवले आहे. महाराष्ट्र कारागृह विभागाच्या भरती परीक्षेत घवघवित यश संपादन करत त्यांची 'कारागृह पोलीस' (पुणे) या पदावर निवड झाली आहे. त्यांच्या या यशामुळे जळगाव जामोद तालुक्यात आनंदाचे वातावरण असून, सर्वस्तरातून त्यांच्यावर अभिनंदनाचा वर्षाव होत आहे.निखिल यांना लहानपणापासूनच पोलीस दलात भरती होऊन देशसेवा करण्याची तीव्र इच्छा होती. घरची आर्थिक परिस्थिती बेताची असतानाही त्यांनी आपल्या ध्येयापासून कधीही माघार घेतली नाही. अंगावर गरिबीचे सावट असतानाही, निखिल यांनी अपार मेहनत घेतली. पहाटेचा मैदानी सराव आणि दिवसाचा अभ्यासाचा सखोल सराव अशा दुहेरी कसरतीतून त्यांनी स्वतःला परीक्षेसाठी पूर्णपणे तयार केले.महाराष्ट्र कारागृह विभागामार्फत घेण्यात आलेल्या कठीण भरती प्रक्रियेत निखिल यांनी लेखी परीक्षेत आपल्या बुद्धिमत्तेची चुणूक दाखवली, तर मैदानी चाचणीत शारीरिक क्षमता सिद्ध करत उत्कृष्ट कामगिरी केली. या दोन्ही परीक्षांच्या एकत्रित गुणांच्या जोरावर त्यांनी अंतिम गुणवत्ता यादीत स्थान मिळवले आणि पुणे येथे कारागृह पोलीस म्हणून आपली वर्णी लावली.
_____________________________
"आमची परिस्थिती नसतानाही निखिलने जिद्द सोडली नाही. त्याने घेतलेल्या कष्टाचे आज चीज झाले आहे. लेकाचे स्वप्न पूर्ण झाल्याचा आज आम्हाला सार्थ अभिमान वाटतो."
— रमेश बंबटकार (निखिल यांचे वडील)
_____________________________
निखिल यांच्या निवडीची बातमी समजताच खेर्डा बुद्रुक गावात उत्साहाचे वातावरण निर्माण झाले. ग्रामपंचायत सदस्य, प्रतिष्ठित नागरिक, शिक्षक आणि मित्रपरिवाराने त्यांच्या घरी जाऊन पेढे भरवून त्यांचे अभिनंदन केले. सोशल मीडियावरही त्यांच्यावर शुभेच्छांचा पाऊस पडत आहे.आपल्या यशाचे श्रेय आई-वडील, कुटुंबीय, मार्गदर्शक शिक्षक आणि मित्रांना देताना निखिल म्हणाले की, "ग्रामीण भागातील युवकांनी प्रतिकूल परिस्थिती पाहून कधीही जिद्द सोडू नये. ध्येय गाठण्यासाठी सातत्यपूर्ण प्रयत्न केले, तर यश निश्चित मिळते."निखिल लवकरच पुणे येथे कारागृह पोलीस म्हणून आपली सेवा बजावण्यासाठी रुजू होणार आहेत. त्यांच्या या नेत्रदीपक यशाबद्दल त्यांचे सर्वत्र कौतुक होत आहे.