जळगाव जामोद(प्रतिनिधी);
दीर्घ पल्ल्याच्या सायकलिंगमध्ये सातत्य, शारीरिक क्षमता, मानसिक ताकद आणि वेळेचे अचूक नियोजन यांची कठोर परीक्षा घेतली जाते. या सर्व आव्हानांवर मात करत बुलढाणा येथील मृणाल संजय पडोळसे आणि जळगाव जामोद येथील अंकित नरेंद्रजी देशमुख यांनी BRM (Brevets des Randonneurs Mondiaux) मालिकेतील आव्हानात्मक राईड्स यशस्वीरीत्या पूर्ण करून ‘Super Randonneur’ हा मान पटकावला आहे.BRM मालिकेतील विविध अंतरांच्या राईड्स पूर्ण करण्यासाठी सायकलस्वारांना दीर्घ अंतर, निर्धारित वेळ, बदलते हवामान आणि शारीरिक-मानसिक थकवा अशा अनेक आव्हानांना सामोरे जावे लागते. मृणाल पडोळसे आणि अंकित देशमुख यांनी सातत्यपूर्ण सराव व मेहनतीच्या जोरावर या राईड्स पूर्ण करत आपल्या कामगिरीची छाप उमटवली.मृणाल पडोळसे यांनी महिला गटात कमी वयात ‘Super Randonneur’चा मान मिळवून उल्लेखनीय कामगिरी केली आहे. तर अंकित देशमुख हे जळगाव जामोद शहरातील पहिले ‘Super Randonneur’ ठरल्याचे सांगण्यात येत आहे. त्यांच्या या कामगिरीमुळे जळगाव जामोद तसेच बुलढाणा जिल्ह्याच्या सायकलिंग क्षेत्रात आनंदाचे वातावरण निर्माण झाले आहे.या यशामागे सातत्यपूर्ण सराव, योग्य मार्गदर्शन आणि कुटुंबीयांसह सहकाऱ्यांचे प्रोत्साहन महत्त्वाचे ठरले. त्यांच्या या प्रवासात डॉ. आदित्य जाधव यांचेही सहकार्य लाभले.मृणाल संजय पडोळसे आणि अंकित नरेंद्रजी देशमुख यांच्या या उल्लेखनीय यशाबद्दल सायकलिंगप्रेमी, मित्रपरिवार आणि विविध स्तरातून त्यांचे अभिनंदन होत असून, त्यांच्या कामगिरीमुळे दीर्घ पल्ल्याच्या सायकलिंगकडे नव्या पिढीतील युवक-युवतींना प्रेरणा मिळत आहे.