जळगाव जामोद(प्रतिनिधी);
पाणी म्हणजे केवळ निसर्गाने दिलेला एक स्रोत नाही, तर प्रत्येक सजीवाचा श्वास आणि येणाऱ्या पिढ्यांच्या भविष्याचा आधार आहे. त्यामुळे आज पाण्याचा प्रत्येक थेंब जपला, तरच उद्याच्या पिढीला पाण्यासाठी संघर्ष करण्याची वेळ येणार नाही. “आजचा एक थेंब वाचवा, उद्याचे जीवन सुरक्षित करा,” असे भावनिक आवाहन जळगाव जामोद विधानसभा मतदारसंघाचे आमदार डॉ. संजय कुटे यांनी नागरिकांना केले आहे.दैनंदिन जीवनात अनेकदा आपल्या नकळत मोठ्या प्रमाणावर पाण्याचा अपव्यय होतो. सुरू राहिलेले नळ, दुर्लक्षित गळती, गरजेपेक्षा अधिक पाण्याचा वापर अशा छोट्या-छोट्या बाबींमधून हजारो लिटर पाणी वाया जाते. हा अपव्यय रोखण्यासाठी प्रत्येकाने स्वतःपासून सुरुवात करण्याची गरज असल्याचे आ. डॉ. संजय कुटे यांनी अधोरेखित केले.“पाण्याचा प्रत्येक थेंब अमूल्य आहे. आपण आज पाण्याची किंमत ओळखली नाही, तर उद्या आपल्या मुलांच्या हातात पैसा असेल; मात्र पिण्यासाठी पुरेसे पाणी असेलच याची खात्री देता येणार नाही. म्हणून पाणी वाचविणे ही केवळ शासनाची किंवा प्रशासनाची जबाबदारी नसून ती आपल्या प्रत्येकाची सामाजिक जबाबदारी आहे,” अशी भावना त्यांनी व्यक्त केली.घरातील नळांची गळती तातडीने दुरुस्त करणे, आवश्यक तेवढेच पाणी वापरणे, वाहन किंवा अंगण धुताना पाण्याचा अनावश्यक वापर टाळणे, शक्य तेथे वापरलेल्या पाण्याचा पुनर्वापर करणे आणि पावसाचे पाणी जमिनीत मुरविण्यासाठी प्रयत्न करणे, अशा छोट्या कृतींमधूनही मोठी जलबचत होऊ शकते.उन्हाळ्यात पाण्याच्या एका हंड्यासाठी होणारी धडपड आपल्याला पाण्याचे खरे मोल शिकवते. त्यामुळे पाणीटंचाई निर्माण झाल्यानंतर उपाय शोधण्यापेक्षा आजपासूनच पाणी बचतीची सवय लावणे अधिक महत्त्वाचे आहे.
“आपण वाचविलेला प्रत्येक थेंब हा आपल्या मुलांच्या भविष्यासाठी केलेला संचय आहे. पाणी आहे तर शेती आहे, हिरवाई आहे, गाव आहे आणि जीवन आहे. म्हणून स्वतः पाणी वाचवा आणि इतरांनाही पाणी वाचविण्यासाठी प्रेरित करा,” असे कळकळीचे आवाहन आ. डॉ. संजय कुटे यांनी केले.
•‘थेंब थेंब जपूया... भविष्य सुरक्षित करूया’....
“पाणी निसर्गाची अमूल्य देणगी आहे. आज आपण त्याचा आदर केला तर उद्याची पिढी आपल्याला धन्यवाद देईल. नळातून विनाकारण वाहणारा प्रत्येक थेंब थांबवूया. कारण आजची जलबचत हीच उद्याच्या पिढीसाठीची सर्वात मोठी ठेव आहे.”
— आ. डॉ. संजय कुटे